ရခိုင်ပြည်နယ် ကယ်ဆယ်ရေးနှင့် ပြန်လည်ထူထောင်ရေး အစည်းအဝေး နေပြည်တော်တွင် ကျင်းပ

ရခိုင်ပြည်နယ် ကယ်ဆယ်ရေးနှင့် ပြန်လည်ထူထောင်ရေး အစည်းအဝေး နေပြည်တော်တွင် ကျင်းပ

ဒီဇင်ဘာ ၁၈၊ ၂၀၁၂
M-Media

နယ်စပ်ရေးရာဝန်ကြီးဌာနက ကြီးမှုးကျင်းပသည့် ရခိုင်ပြည်နယ် ကယ်ဆယ်ရေးနှင့် ပြန်လည်ထူထောင်ရေး အစည်းအဝေး တစ်ရပ်ကို ယမန်နေ့၁၈.၁၂.၂၀၁၂  ရက် နံနက် ၁ဝ နာရီခွဲတွင် နေပြည်တော် ရှိ နယ်စပ်ရေးရာဝန်ကြီးဌာန စုပေါင်းခန်းမတွင် ကျင်းပကြောင်းသိရှိရသည်။
အဆိုပါ အစည်းအဝေးသို့ ကုလသမဂ္ဂ အဖွဲ့အစည်းများ ဆိုင်ရာ ညှိနှိုင်းရေးမှူး UNDP ဌာနေ ကိုယ်စားလှယ် Mr. Ashok Nigam၊ အစ္စလာမ် သာသနာရေးရာကောင်စီ ဌာနချုပ်မှ   ဦးဝဏ္ဏရွှေ၊ ဦးဇော်ထွန်းနှင့် ဦးသိန်းထွန်းတို့ တက်ရောက်ကြပြီး မြန်မာမွတ်စလင်မ် အမျိုးသားရေးရာ အဖွဲ့ချုပ်မှ တာဝန်ရှိသူများလည်းတက်ရောက်ကြသည်။

အစည်းအဝေးသို့ တက်ရောက် လာကြသည့် မြန်မာနိုင်ငံ ဆိုင်ရာ ကုလသမဂ္ဂ အဖွဲ့ အစည်းများ၏ ဌာနေ ကိုယ်စားလှယ်များ၊ နိုင်ငံတကာ အစိုးရ နှင့်အစိုးရ မဟုတ်သော အဖွဲ့ အစည်းများ၊ အစ္စလာမ်ဘာသာရေးအဖွဲ့အစည်းများ၊ ဌာနဆိုင်ရာ များနှင့် လူမှုရေး အဖွဲ့အစည်း အသီးသီးမှ ကိုယ်စားလှယ်များက လက်ရှိ အကောင်အထည်ဖော် ဆောင်ရွက်လျက် ရှိသည့် လူသားချင်း စာနာသော အထောက် အပံ့ပေးရေးဆိုင်ရာ လုပ်ငန်း များ ဆောင်ရွက်နေမှု အခြေအနေ၊ ရှေ့လုပ်ငန်းစဉ်၊ သဟဇာတဖြစ်သည့်  လူ့အဖွဲ့ အစည်း ပေါ်ပေါက်ရေး ဆိုင်ရာ အတွေးအမြင် အယူအဆများ၊ရင်ဆိုင် ကြုံတွေ့ ရသည့် အခက်အခဲများ၊ စိန်ခေါ်မှု များကိုပူးပေါင်းညှိနှိုင်း ဖြေရှင်းနိုင်ရန် အသီးသီး တင်ပြ ဆွေးနွေး ခဲ့ကြသည်။

ရခိုင်ပြည်နယ်အတွင်းရှိ  နှစ်ဖက် လူ့အဖွဲ့ အစည်း အသီးသီးတွင် စိတ်ခံစားမှုများနှင့် မကျေနပ် ချက်များ ရှိနေဆဲ ဖြစ်သည်ကို သုံးသပ် တွေ့ရှိရသော်လည်း လွဲမှားသော အတွေးအခေါ် အယူအဆ များကို ပြုပြင် ပြောင်းလဲရန်လိုအပ်ပါကြောင်း၊ နယ်မြေဒေသ တည်ငြိမ် အေးချမ်းပြီး တရားဥပဒေ စိုးမိုးရေးလုပ်ငန်းစဉ်များ ပိုမို ဖြစ်ထွန်း လာရေးအတွက် ကျောက်တော်၊ မြောက်ဦး၊မင်းပြားနှင့် မြေပုံ လေးမြို့နယ်ကို မြောက်ဦး ခရိုင်အဖြစ်ဖွဲ့စည်းနိုင်ရေး ဆောင်ရွက်လျက် ရှိကြောင်း ကို အဆိုပါအစည်းအဝေးမှသိရှိရသည်။
တစ်ချိန်တည်းတွင် ကုလသမဂ္ဂ အထွေထွေ အတွင်း ရေးမှူးချူပ်ရဲ့ မြန်မာနိုင်ငံဆိုင်ရာ အထူး ကိုယ်စားလှယ် မစ္စတာ ဗီဂျေး နမ်ဘီယားဟာ ရခိုင်ပြည်နယ်ကိုသွားရောက်ပြီး ရခိုင် တိုင်းရင်းသား တွေနဲ့ မွတ်စလင်တွေ အတူတကွ နေထိုင်ရေးအတွက် ဒေသခံတွေနဲ့ သွားရောက် တွေ့ဆုံ ဆွေးနွေး ခဲ့ပါတယ်။

ယနေ့ ၂၀.၁၂.၂၀၁၂နေ့ထုတ် နိုင်ငံပိုင် သတင်းစာများတွင် မူအဆိုပါအစည်းအဝေးသို့ တက်ရောက်ခဲ့သည့် အစ္စလာမ်ဘာသာရေးအဖွဲ့အစည်းများ၏ အမည်များဖြစ်သည့်  မြန်မာမွတ်စလင်မ် အမျိုးသားရေးရာအဖွဲ့ချုပ် ကို မြန်မာ-မူဆလင် အမျိုးသားအဖွဲ့ချုပ်ဟုလည်းကောင်း၊
အစ္စလာမ် သာသနာရေးရာကောင်စီ ဌာနချုပ်ကို အစ္စလာမ်မစ်ကောင်စီ ဌာနချုပ်ဟုလည်းကောင်း မှားယွင်းရေးသားထားပြီး မျက်နှာဖုံးသတင်းတွင် ဖော်ပြထားသည်ကိုတွေ့ရသည်။